ROXAS CITY – Nagapalangurog sa kahadlok nga ginsaysay sang pito ka tuig nga bata nga babaye sa iya iloy nga gintuyo ini nga kidnapon sang duha ka lalaki nga sakay sa puti nga van sa Sitio Luyo, Brgy. Culasi, Roxas City.
Sa interview sang Bombo Radyo kay alyas “Daday”, iloy sang bata, ginsaysay sang iya bata nga ginpondohan ini sang puti nga van kun sa diin may duha ka lalaki nga nagpanaog kag ginkaptan ang bata nga tuyo pasakyon sa van.
Bangud sa kahadlok, ginwakli sang bata ang kamot sang lalaki kag gilayon nga nagdalagan sa nabukid nga bahin sa likod sang eskwelahan kag didto nagpanglaktod papuli sa ila balay.
Nagapati naman ang iloy nga wala naga-ubra sang istorya ang iya bata bangud nakita sini nga tuman ang kahadlok sang iya bata kag masami ginadaman kun magtulog kun gab-i.
Bangud sa natabo, nagdesisyon si Daday nga bantayan nalang permi ang iya bata sa eskwelahan tubtob nga makapauli sa ila balay.
