ROXAS CITY – Nangin madinalag-on ang ginhiwat nga groundbreaking ceremony para sa igatukod nga bag-o nga state of the art nga Capiz Provincial Capitol sa Pueblo de Panay, Roxas City.
Ginpanganuhan ang nasambit nga seremonya ni Capiz Governor Fredenil H. Castro kag yara man ang presensya nanday Vice Governor James Magbanua, Roxas City Mayor Ronnie Dadivas, Pueblo de Panay President Jose Neri Ong, kag iban pa nga mga kilala nga mga opisyal sang gobyerno probinsyal kag syudad sang Roxas.
Ginhatagan pagtamod ni Governor Castro ang bilidhon nga kasaysayan sang igatukod nga Capiz Provincial Capitol para sa kauswagan, paghiliusa kag bugal sang pumuluyo.
Nagpabutyag man sang ila panan-awan ang pila ka kilala nga bisita angut sa positibo nga impact sa igatukod nga bag-o nga kapitolyo.
Ang state of the art nga pasilidad ang mangin sentro para sa epektibo nga pagdumalahan, simbolo sang moderno nga pang-gobyerno kag isa ka inspirasyon para sa pagsanyog sang ekonomiya sa Capiz.
Sa opisyal nga pagsugod sang konstruksyon, ang groundbreaking ceremony ang nagserbe nga isa ka pahanumdom kag promisa sa komunidad agud makaangkon sang mas masanag kag mas mauswag nga buwas-damlag.
Ginpasalamatan man ni Governor Castro ang mga opisyales sang gobyerno probinsyal kag syudad sa suporta agud matigayon ang pagpatukod sang bag-o nga building sang Provincial Capitol.
Nagpasalamat man ini sa presidente sang Pueblo de Panay nga si Jose Neri Ong, nga nagdonar sang 3 ka ektarya sang lote nga pagapatukuran sang amu nga state of the art nga kapitolyo.
Suno pa sa gobernador ginaplanuhan man nila nga isaylo sa Pueblo de Panay ang Roxas City Hall.
Nahibaluan nga may kalaparon ang bag-o nga kapitolyo sang 15,000 square meters nga floor area kag may lima ka panalgan, may yara man ini sang expansive grounds nga sarang maka-akomodar sang 200 ka parking slots.
