Nagpanindugan ang Cagayan de Oro City Rice and Corn Retailers Association kag United Market Vendors Association nga wala sang garantiya nga maganubo ang presyo sang bugas sa tion nga ipatuman sang gobyerno ang 60-day import ban sa imported premium rice nga nagasulod sa Pilipinas.
Suno kay Engr. Franklin Dagcuta, presidente sang nasambit nga asosasyon, ang ginaplano nga pagdumili sa pag-import posible nga magtulod sa presyo sang bugas nga magtaas sa baylo nga magnubo.
Ginpaathag niya nga ang import ban gin-anunsyo sang temprano, nga nagahatag sa mga retailer sang kahigayunan nga mamarkahan ang ila imbentaryo bisan pa nga ginbakal ini sa mas manubo nga presyo pila ka bulan na ang nakaligad.
Dugang pa sini, dapat anay siguraduhon sang gobyerno nga may yara sang bastante nga buffer stock sang rice supplies antes dumilian ang pag-import sang bugas sa pungsod.
Samtang, madumduman nga sa ginpatigayon nga Senate hearing sang Committee on Agriculture, Food and Agrarian Reform sa pagpanguna ni Sen.Francis ‘Kiko’ Pangilinan, gin-anunsyo ni Department of Agriculture (DA) Secretary Francisco Tiu Laurel Jr nga ipatuman ang 60-day import ban sa una nga adlaw sang Setyembre.
Ginalauman nga makabulig ini sa mga lokal nga mangunguma sa pagbaligya sang ila humay kag ibaligya ini sa nagakaigo nga presyo.
