PANITAN, CAPIZ – Nagapanawagan sang aksyon ang mga residente sang Sitio Pangpang, Barangay Cadio, Panitan, Capiz, matapos maguba kag marusdak ang ila karsada, upod ang river control nga dapat nagaserbi bilang proteksyon batok sa pagbaha kag pag-erode sang duta.
Sa interview sang Bombo Radyo kay Gilda Degracia, indi na makalabay ang mga salakyan sa lugar kag delikado man para sa mga nagalakat nga tawo.
Suno kay Gilda, may mga litik kag nagahabil-habil na nga duta nga posible magresulta pa sa mas malala nga landslide.
Pahayag niya, nakabati man sila sang mabaskog nga tunog kag paglupok sa tungang gab-i antes matabo ang pagkaguba sang dalan nga para sa ila senyales sang peligro kag nagapanginahanglan na sang aksyon halin sa gobyerno.
Dugang pa sang natungdan, apektado man ang ila pang-adlaw-adlaw nga kabuhi sang mga residente, lakip ang pagbyahe sang mga estudyante, pagdala sang produkto, pagkuha sang tubig, kag access sa emergency response.
Pahayag pa ni Gilda, nabisitahan naman sang pila ka ahensya sang gobyerno ang ila lugar, apang wala pa sang konkreto nga tikang ukon solusyon.
Sa subong padayon ang ila panawagan sa lokal kag nasyonal nga gobyerno sang bulig agud mapasiguro ang ila seguridad kag kabuhi sa tunga sang padayon nga peligro.
– Interviewed by: Bombo Jessa Mae De Los Santos
