Isa ka dako nga wild nga elepante ang nagtuga sang gamo sa isa ka grocery store sa Thailand sang nagsulod ini nagikan sa kalapit nga national park agud magkaon sang mga pagkaon sa amo nga tindahan.
Sa isa ka viral video, makit-an ang elepante nga lalaki nga ginatawag nga ‘Plai Biang Lek’ nga nag-urong sang makadali sa atubang sang tindahan nga malapit sa Khao Yai National Park sa Thailand antes nga nagsulod. Diri kag kalmado nga nagkaon sang snacks nagikan sa counter apisar pa nga gin-testingan ini nga pahalinon sang mga tinawo sang parke.
Naguha ang elepante nga karga pa ang isa bag sang pagkaon gamit ang iya sini nga trunk. Gamay lang man ang ginbilin nga halit sang pagsulod sang amo nga elepante sa tindahan, kaangay sang paglapta sang lapok sa salog kag minor nga pagkaguba sang kisame.
Suno sa tag-iya sang tindahan nga si Kamploy Kakaew, nagkaon ang elepante sang syam ka pakete sang sweet rice crackers, isa ka sandwich, kag pila ka mga ginpamala nga saging. Samtang, wala man sang may nasakitan sa amo nga insidente.
Ginsiling man ni Danai Sookanthachat, isa ka volunteer sa parke, nga kilala na ang amo nga elepnate sa lugar kag masami ini nga nagasulod sa mga puluy-an agud magpangita sang pagkaon kag una ini nga bes nga natabo nga nagsulod ini sa isa ka tindahan.
Dugang pa sini, amat-amat nga nagadamo ang mga layaw nga elepante sa Khao Yai National Park nga nag-guluha gikan sa talon agud magpangita sang pagkaon sa syudad, nga nagatuga sang madamo nga tion sang gamo.
Madumduman nga sang 2024, ginabulubanta may 4,000 ka mga layaw nga elepante sa Thailand, apang bangud sa pagkuba sang ila sini nga ilistaran, napilitan ang mga elepante nga maguha agud magpangita sang pagkain, nga kun kaisa nagatuga sang peligro sa pareho nga tawo kag sapat
