Isa ka gym sa Binzhou City, Shandong Province, China nangin viral bangod sang ila pinasahi nga tanyag: isa ka second hand nga Porsche Panamera sports car para sa una nga miyembro nga mahimo makapabuhin sang 50 ka kilo sa sulod sang tatlo ka bulan.
Ang sin-o man nga luyag mag-upod dapat magbayad sang 10,000 yuan (katumbas sa P82,000). Ini nga bayad nagasakop sang tatlo ka bulan nga intensive training, lodging, kag pagkaon sa gym.
Suno sa isa ka gym fitness coach, pito tubtub walo na ka tawo ang naka-sign up para sa amo nga challenge.
Nagapadayon subong ang registration kag magasirado kun may yara na sang 30 ka partisipante.
Apisar madamo ang na-engganyo sang tsansa nga magdaug sang isa ka luxury sports car samtang nagapaniwang, nakakuha ini sang mabaskog nga kritisismo gikan sa mga eksperto sa ikaayong lawas. Nagpaandam ang mga eksperto nga ang tanyag sang gym nagabutang sa katalagman sang mga katapo sang gym.
