ROXAS CITY – Ginpahamtang sa half-mast ang hayahay sa municipal hall sa banwa sang Sapian, Capiz, bilang paghatag sang respeto sa napatay nga si Vice Mayor Cris Obordo.
Sa interview sang Bombo Radyo Roxas kay Sangguniang Bayan member Doc Ferdinand Baguio, ginpahayag sini nga nagapangasubo sa karon ang bilog nga banwa sang Sapian bangud sa pagkamatay sang bise alkalde nga ginakabig sini maayo nga lider.
Ginlaragway man ni Dr. Baguio ang anay bise alkalde nga very decisive nga presiding officer nga bisan san-o nagapabilin nga impartial kag ginapamatian ang tanan nga opinyon sang mga kaupdanan.
Nasubuan pa ang opisyal sa pagkamatay ni Obordo, bangud madamo pa kuntani ini sang plano nga himoon nga makabulig sa pag-umwad sang ila banwa.
Samtang posible nga himoon sa Lunes ang pagsworn in ni 1st Sangguniang Bayan member Ralph Odronia nga magabulos sa pwesto ni Obordo bilang Vice Mayor sang Sapian.
Ba-se sa rule of succession nga sa kasubong sini nga kaso, otomatiko nga ang 1st SB member ang magapungko bilang bise alkalde.
