ROXAS CITY– Dismayado ang hepe sang Bantay Dagat task force matapos nagpamalibad ang Philippine Coast Guard kag Philippine Maritime Police nga mag-upod sa operasyon batuk sa mga nagapatigayon sang illegal nga pagpangisda.
Suno kay Punong Barangay Manuel “Bong-Bong’ Aninang nga mas madasig kuntani nga matapna ang mga nagapatigayon sang illegal nga pagpangisda kun mag-upod ang PCG, Maritime Police kag Bantay Dagat sa operasyon.
Ginpahayag ni Aninang nagpamalibad ang PCG nga mag-upod bangud sandig sa ila mandato nga search and rescue lamang ang ila nga sakop.
Samtang sa bahin naman sang Maritime Police nga luyag nila nga magpatigayon sang ila kaugalingon nga operasyon batuk sa mga illegal fishers.
Aminado si Aninang nga daku kuntani ang mabulig sang duha ka mga ahensiya agud madasig nga madakpan ang mga sakayan kag indi na sila makapalagyo sa tion sang operasyon.
Apang sa pihak nga nagpamalibad ang duha ka mga ahensiya ginpasiguro ni Aninang nga indi maapektuhan ang ila masusog nga operasyon.
Suno pa kay opisyal nga tion na kuntani nga masaksihan sang duha ka mga ahensiya sang gobyerno nga legal kag husto ang ila pagpanakop sa mga madakpan nga mga sakayan pangisda.
