ROXAS CITY -Ginpanindugan sang hepe sang Ivisan Municipal Police Station nga ginasunod lamang sang ila mga deputized personnel ang pagsulundan sang Land Transportation (LTO) natuhoy sa istrikto nga dakpanay sang mga motorista sa banwa sang Ivisan.
Ini ang ginpahayag ni Police Captain Leomindo Tayupon, Hepe sang Ivisan Municipal Police Station sang mainterview sang Bombo Radyo kasunod sang reklamo sang mga motorista sa tuman ka strikto nga dakpanay sa pihak sang covid-19 disease.
Ginpahayag ni Tayupon nga hugot nga ginpatuman sang mga deputized personnel sang Ivisan PNP ang ‘No Helmet, No Travel’ policy sang Land Transportation Office (LTO).
Suno pa sa opisyal nga wala man ginadakup sang mga kapulisan ang mga motorista nga wala sang violation.
Gin-athag man sini, nga sa talatapan sang LTO nagbayad sang multa ang mga nagkaladakpan nga mga motorista kag indi sa police station.
Gindugang pa ni Tayupon nga nakahibalo na ang mga pumuluyo nga may dakpanay sa mga motorista nga indi magsuksok sang helmet bangud antes pa man ini gin-implementar, nagpatigayon na sang rekorida ang mga kapulisan.
Samtang ginkompirmar man ni Tayupon nga ginpatawag ni Police Colonel Gustilo ang isa sa mga deputized personnel nga si Police Corporal Randy Besana kag gin-usisa.
Apang ginpahayag ni Tayupon nga indi mahimo makasuhan si Besana bangud wala man ini sang ginlapas nga laye.
