Hepe sang Roxas City PNP gin-athag nga P2.3 million pesos ang balor sang shabu nga narekober sa 3 ka mga drug suspects sa drug buybust ops’ sa banwa sang Ivisan, Capiz

ROXAS CITY – Gin-athag sang hepe sang Roxas City Police Station ang kabug-osan nga balor sang shabu nga narekober sa tatlo ka mga persona nga nadakpan sa ginkasa nga drug buybust operation sa Barangay Poblacion Norte, Ivisan Capiz.

Suno kay Police Lieutenant Colonel Ricardo Jomuad Jr., nga nagpakig-angut sa iya ang Philippine Drug Enforcement Agency ukon PDEA kag gin-athag nga P2.3 million ang kabug-usan nga balor sang iligal nga droga ang narekober sa mga suspek nga sanday Jean Francis, Junjun Lima kag German Bolarde.

Nahibaluan nga nagabug-at sang 180 gramos ang iligal nga shabu.

Matandaan ang nasambit nga operasyon ang ginkasa sang mga katapo sang Station Drug Enforcement Team sang Ivisan Municipal Police Station, Roxas City Police Station kag Philippine Drug Enforcement Agency.