ROXAS CITY –Nagapati ang utod sang 18-anyos nga soltero nga indi sini mahimo ang ginaalegar pagmolestiya kag pagpanghimulos sa ila pito katuig nga gumangkon sa isa ka barangay sa siyudad sang Roxas.
Sa exclusive interview sang Bombo Radyo kay Alyas Toto, hugot sini nga ginpanindugan nga indi mahimo sang iya manghod ang alegasyon bangud mabuot, wala sang bisyo kag may yara ini sang nobya.
Suno kay Alyas Toto nga ginkakibot na gid lamang sini sang nagpauli ang manghod nga nagahilibion matapos nga ginaalegar ginsumbag sang makapila ka beses sang iya pakaisa nga amay sang biktima.
Sa pagpangusisa sini sa manghod, ginsugid sa iya nga ginpatutuan ini nga ginmolestiya kag ginhimuslan sini ang ila pito ka tuig nga gumangkon apang hugot man sini nga ginpanginwala.
Gindugang pa ni Alyas Toto nga ginkaakig man sang iya manghod sang nakita sini ang alatrasan sang biktima samtang nagpamuhin ini, kabaliskaran sa alegasyon batuk sa iya.
Samtang, wala naman ini sang ihibalo kun sa diin na nagpadulong ang manghod bangud hinali na lamang ini nagbiya sa ila panimalay.
Dugang pa ni Alyas Toto nga nagapati sila nga inosente ang manghod tubtob wala pa nakaguwa ang resulta sang medical examination
