ROXAS CITY – Padayon nga ginabulong sa ospital ang isa ka senior citizen matapos nga ginaalegar ginpukpok sang martilyo sang 23-anyos nga lalaki sa Barangay Banica, Roxas City.
Nahibaluan nga nagpadulong ang suspek nga si Joel Codilla sang Barangay Kataingan, Masbate sa tiangge ni Anita Adorio 60-anyos sa Barangay Banica kun sa diin naluoy sa iya biktima rason nga ginhatagan pa ini sang pagkaon.
Apang, wala ginalaoman sang biktima nga may yara sang malain nga tuyo ang suspek kun sa diin hinali na lamang sini ginluok kag ginpokpok si Adorio sa ulo gamit ang martilyo kag ginkuha ang sling bag nga may unod nga P7,734 nga kwarta kag cellphone.
Sa interview sang Bombo Radyo kay Milagros Solis 49-anyos isa sa mga nagbulig sa suspek ginpahayag sini nga ginpatinir niya sa balay ang suspek samtang indi pa ini makapauli sa Masbate.
Ini bangud naluoy siya sa suspek apang wala sini ginalaoman nga himuon ini ni Adorio bangud sa iya pagkilala nga mabuot kag mahipuson rason nga nakibot ini sang gindakop sang mga tanod.
Samtang, ginpahayag naman ni Gemma Alimonsoren himata sang biktima nga desidido sila magpasaka sang nagakaigo nga panumbungon batuk sa suspek agud indi na pagpamarisan pa sang iban.
Matandaan nga gintuyo sang biktima nga kawaton ang sling bag ni Adorio nga may unod nga kwarta apang gilayon man ini nadakpan sang mga tanod.
Sa karon, nakahunong na ang suspek sa Roxas City Police Station.
