ROXAS CITY – May gamay sa gihapon nga pagduda ang himata sang Person Deprived of Liberty (PDL) nga nag-utas sang iya kaugalingon nga kabuhi, sa quarantine facility sang Bureau of Jail Management and Penology (BJMP) Mambusao District, sadtong Marso 16, sini nga tuig.
Ini ang ginpahayag ni Ms. Niña Jean Felasol, isa sa mga bata sang PDL nga si John Felasol, sang Brgy. Sto. Niño, Dumalag, Capiz, sang mainterview sang Bombo Radyo.
Suno diri, nagguwa na ang resulta sang ginpatigayon nga autopsy examination sa bangkay sang ila amay, kag nasaad nga napatay ang biktima bangud sa ‘lack of oxygen’ ukon posibe nga bangud sa paghikog.
Wala man ini sang nakita nga gaob sa lawas sang iya amay, nga patimaan nga ginsakit ini, apang apisar nga nagaguwa sa autopsy exam nga wala sang foul play sa kamatayon sang biktima, indi madula sa ila pamilya nga magduda.
Nahibaluan nga antes paman gintransfer ang ila amay sa BJMP-Mambusao, nagtenir ini sa Dumalag Municipal Police Station sumugod sang nadakpan ini sa drug buy bust operation sang Pebrero 27, sang gab-i, kun sa diin, ginsaysay sang iya amay nga samtang nagapauli ini sakay sa motorsiklo nga ginagamit ‘service’ sa pagdul-ong sa ila nga mag-utod sa trabaho, hinali nalang nga may nagbangga sa iya nga wala makilala nga lalaki kag ginpahog nga kun indi magpundo, pagaluthangon ini.
Dugang pa sa pagsaysay sang iya amay nga bangud sa kakulba, ginsunod sini ang luyag sang lalaki kag gindala sa isa ka waiting shed kag didto nakaplastar na ang mga drug evidences kag may mga pulis na kag brgy. official.
Ginpasakaan sang kaso nga paglapas sa RA 9165 ukon ‘Comprehensive Dangerous Drugs Act of 2002’ ang ila amay pinaagi sa inquest proceedings kag wala sang piyansa para sa temporaryo nga kahilwayan.
Sang yara sa karsel sang Dumalag MPS ang ila amay, ginsiling ni Felasol nga maayo man ang kahimtangan sang ila tatay, apisar nga indi makapati nga gindakop ini sa pagduso sang iligal nga droga.
Tubtob nga gintransfer ang ila amay sa BJMP-Mambusao, kag ginpaidalom sa quarantine.
Marso 11, sang katapusan nila nga naistorya ang ila amay pinaagi sa video call sang isa ka jail officer, kag sa gihapon, wala ini nakitaan sang senyales nga magautas sang kabuhi bangud nagtugon pa ini nga dal-an sang antipara kag pantalon, sa tion nga magtakop ang quarantine period sini sa Marso 16.
Apang, Marso 16 sang aga, sang ginpatawag ang mga ini sang BJMP personnel kag ginpahibalo nga naghikog ang ila amay.
Ginkatingala lang sang mga ini bangud wala sang may nakuha nga laragway ang mga personnel sa amu nga pasilidad nga nagabitay ang biktima, bangud ginpahayag nga wala na ini madumduman tuga sang pagsinakuay nga masalbar pa kuntani ang kabuhi sang PDL.
Sa karon, nakahamyang na ang bangkay sang biktima sa Brgy. San Roque, sa amu man nga banwa.
