ROXAS CITY – Inumol kag tampa ang nadangatan sang Barangay Kagawad kag kaupod sini, sa kamot sang isa ka pulis, sa Barangay Sibariwan, Dumarao, Capiz.
Natabo ini sang Hulyo 2, Sabado nga adlaw.
Ginkilala ang pulis kay PSSgt. Arnel Bucsit, imbestigador sang Dumarao MPS.
Sa nakuha nga impormasyon sang Bombo Radyo, nahibaluan nga nahubog ang nasambit nga pulis kaupod ang hubog man sini nga ka-tropa nga si PSSgt. Antolin Sumatra sa isa ka kaadlawan sa amu nga barangay, rason nga ginlihog si Brgy. Kagawad Jonel Ponsalan nga imaneho ang patrol car, kaupod si Anthony Bajada agud idul-ong ang nakainom nga mga pulis sa ila istasyon.
Apang, sang nakaabot na ang mga ini sa police station, ginaalegar gintapungol ni Bucsit dala tampa si Bajada, kag sa pagtsekyar ni Kgwd. Ponsalan, ini man ang masunod nga ginsumbag sang pulis.
Natigayon man nga matambagan sang iban pa nga mga pulis sa Dumarao, ang nagpangtapungol nila nga ka-tropa.
Sa karon, ginpangkuhaan sang service firearms ang naulamid nga mga pulis sa kinagamo, samtang nagapadayon pa ang imbestigasyon sang ila mga kaupdanan sa Dumarao MPS sa insidente.
Ginpakamaayo man sang mga biktima nga patawaron ang mga pulis.
Wala paman makapaguwa sang statement ang tagdumalahan sang Dumarao MPS angut sa insidente.
