ROXAS CITY – Emosyunal ang human rights advocate lawyer samtang ginasaysay ang natabo nga pagpang-ambush sa ila salakyan kaupod ang anak sini nga doktor kag ang iya kliyente sa Barangay Malapad Cogon, Sigma, Capiz.
Sa interview sang Bombo Radyo Roxas, ginpahayag ni Atty. Cris Heredia, nga indi ini halos makapati nga may magkaisog nga magpaulan sang luthang sa ginasakyan nila nga salakyan samtang pauli na ang mga ini gikan sa hearing sang kaso sang iya nga kliyente sa banwa sang Dao.
Gin-ako sini nga madugay na siya nga nakakabaton sang mga ‘death threat’ apang blangko pa ini sa kun sin-o ang yara sa likod sang pagpang-ambush sa ila.
Mahibaluan nga kilala nga abogado sang mga imol kag miyembro sang National Union of Peoples’ Lawyers (NUPL) si Heredia apang nagpanindugan ini nga indi siya sang ‘threats’ ukon pamahog sa estado bangud ginahimo lamang sini ang iya nga trabaho.
Maswerte naman nga wala naigu sang bala si Heredia kag ang anak sini nga doktor apang nadaplisan naman sang bala sa tangkugo ang kliyente sini nga si alyas Jay nga isa ka suldado matapos nga nagpalupok man ini sang iya bitbit nga armas sa mga suspek.
Sa karon, indi pa matumod ang mga suspek sa pagpang-ambush apang ginapahayag nga sakay ang mga ini sa duha ka mga motorsiklo.
