ROXAS CITY – Nagalaom karon ang pamilya Aguilar nga mahatagan sang hustisya ang pagpangbuno-patay sang isa ka 19 anyos nga construction worker sa ila nga himata nga isa ka military nurse sa Makati City.
Ginkilala ang biktima nga si 2nd Lieutenant Jennett Beron Aguilar, 31 anyos, nurse sa Armed Forces of the Philippines Hospital-V. Luna kag tumandok sang Barangay Milibili, Roxas City.
Indi halos makapati ang pamilya Aguilar sa natabo sa ila nga himata bangud natalana pa kuntani ini nga kaslon sa bulan sang Enero sa masunod nga tuig.
Mahibaluan nga matapos ang krimen gilayon man nga naaresto ang suspek nga si John Louie Brosas nga isa ka construction worker sa Barangay Martirez, Pateros.
Mahibaluan nga gintuyo nga agawon sang suspek ang cellphone ni Aguilar nga nagabantay sang jeep.
Nag-agaway pa ang biktima kag suspek antes ginbuno sang suspek sa dughan ang biktima sang makaduha ka beses.
Gilayon nga gindala ang biktima sa ospital apang ginbawian man ini sang kabuhi.
