Nag-file sang ikaduha nga updated nga listahan sang mga ebidensya ang prosecution panel sang International Criminal Court (ICC) batok kay Former President Rodrigo Duterte, suno sa mando sang Pre-Trial Chamber sang Pebrero 10, 2025.
Suno sa abiso sang ICC, may duha ka bag-o nga items nga gindugang batuk kay Duterte, apang nagapabilin nga confidential ang annex bangud nakaunod ini sang sensitibo nga impormasyon sang testigo.
Ang update nag-abot pila ka adlaw pagkatapos nga gintugutan sang Pre-Trial Chamber ang prosekusyon kag depensa nga magpresentar sang bag-o nga ebidensya.
Matandaan nga gindakop si Duterte sang Marso 11, 2025, sa iya pag-abot gikan sa Hong Kong, bilang kabahin sang imbestigasyon sang ICC sa iya ginatawag nga “war on drugs.”
Suno sa ICC warrant, gin-alegar nga nagtuga, nagpondo, kag nag-armas si Duterte sang mga death squad nga involved sa pagpamatay sa mga ginapatihan drug users kag dealers.
Kaangot sini, makapila man ka beses nga ginbasura sang Pre-Trial Chamber ang hingyo sang depensa sang anay presidente para sa interim release sini.
Ang Pre-Trial Chamber nagtalana sang confirmation of charges hearing para kay Duterte sa Pebrero 23 tubtob 27, 2026 sa The Hague. Ini ang magadesisyon kon bala may bastante nga ebidensya agud lubos nga mapadayon ang kaso batok sa iya.
Ang nasambit nga lihok ang kabahin sang nagapadayon nga imbestigasyon sang ICC sa mga alegasyon sang paglapas sa tawhanon nga kinamatarung sa panahon ni Duterte bilang anay Alkalde kag Presidente sang Pilipinas.
