ROXAS CITY – Arestado ang duha ka mga persona matapos nga ginkasahan sang drug buy bust operation sa Barangay Mongpong, Roxas City, kagab-i sang Domingo, Marso 19.
Ginkilala ang mag-abyan nga sanday Joseph Rendon Francisco,32-anyos, nga residente sang Brgy. Loctugan, Roxas City kag Gerry Mendoza Demalata, 40-anyos kag residente sang San Pedro, Pontevedra, Capiz.
Sandig sa impormasyon nga nagikan sa Roxas Component City Police Station, nakuhaan si Francisco sang 11 tanan ka sachets sang ginapahayag shabu nga may kabug-aton nga 31 gramos kag may balor nga P210,800; P2,000 nga buy bust money, pouch kag cellphone.
Nakuha man sa posesyon ni Demalata ang isa ka unit sang Colt .45 Pistol, magazine nga may pito (7) ka mga bala, holster kag Nissan Navarra Pick up.
Ginpahayag nga makabig High Value Individual (HVI) si Francisco matapos nagapang-walo ini sa PNP-PDEA Anti-Illegal Drugs Watch list provincial level, samtang Street Level Individual (SLI) naman si Demalata.
Sa karon, nagapabilin ang mga ini sa karsel sang Roxas City PNP para sa nagakaigo nga disposisyon kag natalana nga pasakaan sang nagakaigo nga kaso.
