ROXAS CITY – Ginpasakaan sang reklamo sang Capiz Provincial Environment and Natural Resources Office (CaPENRO) sa Provincial Prosecutor’s Office ang operator sang backhoe nga ginagamit sa pag-operate sang ilegal nga quarry sa Barangay Manhoy, Dao, Capiz.
Mahibaluan nga nalabayan lamang sang Task Force Kabalaka 6K ang quarry operation sa nasambit nga lugar rason nga ila ini ginpadulungan kag ginpangitaan sang permit ang operator sang heavy equipment.
Apang ginaalegar nga naghambal ang operator nga magatawag ini kay Mambusao Mayor Leodegario Jun Labao, Jr. kag gilayon man nga nag-abot ang alkalde kag ginaalegar ginpangsita pa sini ang hubon bangud sa pagpauntat sang operasyon.
Ginaalegar nga ginpalibutan pa sang mga salakyan sang alkalde ang mga katapo sang CaPENRO.
Apang natigayon nga nadakpan sang hubon ang backhoe operator nga si Rian Deluviar sang Ilaya, Ivisan kag temporaryo nga ginpakustodiya sa Dao Municipal Police Station ang nasambit nga heavy equipment para sa nagakaigo nga disposisyon.
Kalakip man sa ginpasakaan sang reklamo sang CaPENRO ang wala makilala nga driver sang trak nga ginagamit sa ilegal nga quarry operation.
Panindugan sang CaPENRO nga ang ilegal nga operasyon sang quarry sa nasambit nga lugar ang klaro nga paglapas sa Ordinace No. 11-2017 kag Republic Act 7942.
Ang illegal quarry operation sa nasambit nga lugar ang ginaalegar ginapanag-iyahan ni Mambusao Mayor Labao.
