Gin-eleher bilang National Chairman sang National Movement of Young Legislators (NMYL) si Iloilo City Vice Mayor Love Baronda sa ginpatigayon nga National Convention kag Election sang National Executive Committee sa Manila.
Ang NMYL isa ka pambansang organisasyon sang mga napilian nga pamatan-on nga mga mamalidha halin sa nagkalain-lain nga syudad kag munisipalidad sa bug-os nga Pilipinas.
Tinutuyo sang organisasyon amo ang mapasanyog ang mga kasuguan para sa kabataan, mapabakod ang kooperasyon sang mga lokal nga gobyerno, kag mapa-uswag ang palaabuton nga mga lider sang pungsod.
Sa interview sang Bombo Radyo kay Iloilo City Vice Mayor Baronda, iya ginpahayag nga nagdaug siya sa eleksyon matapos makakuha sang 942 ka boto, batok sa iya kasumpong nga nakakuha sang masobra 100 ka boto.
Suno pa sa bise alkalde, indi ini ang una niya nga pagserbisyo bilang lider sang isa ka liga, bangud nakaagi man siya sang amo sini nga responsibilidad sang tion sang pandemic.
Ginsiguro man ni Baronda nga iprioridad niya ang good governance sa national nga lebel.
Natalana naman ini nga makigsapol sa iya bag-o nga mga kaupdanan agud mahibaluan ang mga programa sa national level nga makabulig sa nagkalain-lain nga Local Government Units (LGUs) sa pungsod.
