ROXAS CITY-Hugot nga ginpanginwala sang iloy ang alegasyon nga ginabugaw sini ang 16-anyos nga dalagita nga anak sa isa ka barangay sa probinsiya.
Sa interview sang Bombo Radyo kay Nanay Amy hugot sini nga ginpanginwala ang alegasyon sang mga malapit nila nga himata natuhoy sa pagbugaw sa iya anak.
Suno sa ginang nga nagatrabaho ini agud may isagud sa anak bangod indi ini makatubos nga ibugaw ang kaugalingon nga anak.
Gindugang pa sini nga saksi man ang ila mga kasilingan sa pagbakas sini nga mapadako ang iya anak.
Sa pagkamatuod suno sa ginang nga makapila ka beses ini nga nagdangop sa VAWC desk agud mangayo sang bulig agud matapna ang masami paglagaw kag pagbarkada sang iya nga anak.
Ginpahayag man sini nga ginapatu-patuan lamang ini sang istorya kag ginasamad sang ila man himata nga nakaaway sini sang tinalikdan nga mga tinuig.
Suno sa ginang nga naakig ang iya nga himata bangod ginreklamo nya ini sa VAWC desk sa pagpangkastigo sa iya nga anak.
Samtang hugot man ang panginwala sang 16-anyos nga dalagita nga ginabugaw ini kag ginabaligya sang kaugalingon nga iloy sa mga lalaki.
Mahibaluan nga may yara sang alegasyon nga ginabugaw sang nasambit nga iloy ang anak sini sa mga nanarisari nga mga kalalakinhan.
