ROXAS CITY – Ginakalipay sang ginikanan nga makasulod sa scholarship program sang gobyerno ang ila mga kabataan nga estudyante pero tani indi pagbawalan nga magpangayo sang bulig sa iban. Nagapamangkot sila kun anu bala ang rason ngaman bawal magpangayo sang dugang nga bulig sa iban nga institusyon.
Ini ang pahayag ni Nanay Dolores, iloy sang isa ka iskolar sang mainterview sang Bombo Radyo.
Suno pa kay Dolores, nahibaluan man nila nga kulang ang P2500 sa isa ka semester, gani nagapangita man sila sang paagi sa pagpangayo sa iban nga grupo ukon indibidwal para masustenir ang pag-eskwela sang bata.
Dugang pa sini, paano nalang kun may mga opisyal nga nagikan sa national nga magatanyag sang bulig sa mga kabataan, apang indi nila ini maagum kay nagapugong ang amo nga ordinansa.
Nagapati si Nanay Dolores nga ang isa sa mga rason sang probinsya para amyendahan ang ordinansa, kay bangud gusto nila magtanum sang daku nga utang nga kabalaslan ang mga estudyante sa probinsya nga amo ang nag hatag sang scholarship sa ila.
