ROXAS CITY – Nagapadayon ang pagpatigayon sang imbestigasyon sa Capiz Rehabilitation Center (CRC), matapos nakuhaan sang 2 ka sachets sang ginapatihan shabu ang pagkaon nga plano kuntani ipalusot para sa isa ka preso.
Sa pagpakig-angut sang Bombo Radyo sa Jail Warden sang CRC nga si Arjuna Yngcong, ginpahayag sini nga may yara sang nagpadala sang pagkaon nga mga chichirya para sa isa ka preso nga si alyas “Mikay”.
Suno diri, base sa ila pagsulundan antes dalayon nga pasudlon ang mga ginahatag sa preso una ini nga ginatsekyar sang mga security guard kag bangud natalupangdan sang isa sa mga ini nga kaangay makaduluda sa amu nga chichirya gindouble check niya ini kag diri nakit-an nga may yara na sang bukas.
Dugang pa diri nga sa ila pagbukas sa amu nga pagkaon, nakit-an ang duha ka sachets kag 3 pa ka empty sachets sang ginapatihan shabu.
Mahibaluan nga sa panaysayon sang driver sang traysikol nga ginpadal-an sang amu nga pagkaon, ginpahayag sini nga ginparahan lamang siya sang wala makilan-an nga persona kag ginhatagan sang P50.00 bilang plete agud idul-ong ang amu nga pagkaon sa CRC.
Bangud sini, palamangkutanon para kay Yngcong kung kay sin-o nagikan ang amu nga pagkaon dala ang illegal nga droga.
Sa karun, nagapabilin nga naka-pending si alyas “Mikay” matapos ang insidente apisar nga wala siya makit-an ukon nadakpan apang ini bangud ang iya pangalan ang ginpangita kag ginatudlo sang amu nga driver.
Samtang, nagapabilin naman sa kustodiya sang Roxas City PNP ang traysikol driver kag natalana nga magpatigayon sang paghinun-anon ang Jail Warden kaupod ang katapo sang kapulisan agud mahibaluan kung pila ang kabug-aton kag Standard Drug Price sang amu nga droga kag masunod nga tikang nga ila pagahimuon.
