Ginsuguran na ang imbestigasyon sa rason sang lapnagon nga pagbaha sa probinsya sang Capiz.
Sa interview sang Bombo Radyo kay Capiz 1st District Board Member Jose Fulgencio “Pepe” Del Rosario, iya ginpahayag nga ang tinutuyo sang provincial board meeting amo ang magpangita sang posible nga solusyon agud mapahagan-hagan ang mga kahalitan ilabi na ang pagkadula sang pila ka kabuhi.
Suno kay Board Member Del Rosario, kinahanglan na sang long-term kag short-term nga solusyon sa mga lugar sa probinsya nga masami kag posible nga bahaon sa tion nga magbaha.
Pahayag pa niya, lauman nga mangin mabinungahon pa ang mga masunod nga pagsinapol bangud paga-imbitaron ang tanan nga mga local government executives kag iban pa nga mga talatapan sang gobyerno nga parte sang nasambit nga pag-imbestiga.
Dugang pa sang natungdan, matuod nga indi malikawan ang mga kalamidad pero mahimo ini nga mapahagan-hagan ang epekto kag kahalitan.
Interviewed by: Bombo Francis Biñas via Zona Libre
