ROXAS CITY, CAPIZ – Lauman nga matapos na subong nga semana ang ginapatigayon nga imbestigasyon Capiz Environment and Natural Resources Office (CAPENRO) angut sa blasting operation sa quarry site sa Barangay Batabat, Maayon, Capiz kag Barangay Poblacion, Sapian, Capiz.
Sa interview sang Bombo Radyo Roxas kay Mr. Ronald Allan F. Cullo, Head sang CAPENRO, iya ginpahayag nga padayon pa ang imbestigasyon sang ila talatapan kaupod ang enforcers may kaangtanan sa reklamo nga blasting operation sa quarry site sang nasambit nga duha ka banwa.
Suno kay Cullo, kun mapamatud-an nga wala sang may ginlapas ang mga tag-iya sang quarry site, i-lift ang ‘cease and desist order’ nga ginpapanaog sa duha ka quarry site sa magkatuhay nga banwa.
Apang kun may problema ukon may paglapas nga makita, i-require ang tag-iya nga mapasabat kag may posibilidad nga ipasarado ang quarry site kag indi pag i-renew.
Dugang pa sang natungdan, sa initial sini nga review, nakaagi sa proseso kag may mga dokumento ang mga tag-iya sang quarry site apang ginaimbestigaran pa ang blasting operation kun insakto ang pamaagi.
Ginkumpirma man ni Cullo nga ginpapanaogan sang cease and desist order ang duha ka nasambit nga quarry site.
Panugyan sini sa mga may kasubong nga negosyo nga sundon ang environment checklist, permit condition kag mga terms sa environmental certificates agud malikawan ang kun ano man nga problema.
– Interviewed by: Bombo Lynd-C Bade and Bombo Jessa Mae Siman De Los Santos
