Indi bastante ang suporta sang mga mamalidha sa Kamara sa mga gin-file nga impeachment complaint agud maduso ini kag mapahalin sa puwesto si Vice President Sara Duterte.
Gin-ako ni House Secretary General Reginald Velasco nga anom ka Kongresista pa lamang ang nag-indorso kag nagasuporta sa tatlo ka impeachment complaint batuk kay VP Sara.
Samtang indi pa sigurado kun madayon pa ang pag-file sang ika-apat nga impeachment.
Ang complaint batuk kay VP Sara ang may kaangtanan sa ginaalegar indi insakto nga paggamit sa P612.5 million nga confidential funds nga ginakalakipan sang P500 million sa Office of the Vice President (OVP) kag P112.5-M sa DepEd sa panahon sang pagdumala sini sa nasambit nga ahensiya.
Kalakip sa mga nagapanguna nga nagasuporta sa tatlo ka impeachment ang tatlo ka Makabayan bloc solons kag Akbayan Partylist Rep. Perci Cendaña.
Gintuad ni Velasco nga sa karon ginahulat pa niya ang ikaapat nga impeachment kay VP Sara agud dululungan na niya ini nga masumiter sa talatapan ni Speaker Ferdinand Martin Romualdez.
Suno kay Velasco, kinahanglan sang 1/3 sa kabug-usan nga numero sang mga mamalidha nga yara sa masobra 300 para mag-abante ang impeachment sa House Committee on Justice kag madala sa plenaryo agud isapinal ang pagboto.
Ginpahayag sini nga mabudlay man nga maabtan sang session break ang nasambit nga impeachment bangud sa nagahilapit nga campaign period sa Pebrero.
Nahibaluan pa nga ang beripikado nga reklamo sang impeachment nga igapadala sa talatapan sang House Speaker ang may 10 ka adlaw antes ini isumiter sa Committee on Rules samtang ang Committee on Justice naman ang magaberipika kun may bastante nga ‘substance and form’ agud maghulag ang impeachment.
Nagakinahanglan sang 154 ka boto gikan sa 308 miyembro sang Kamara samtang 16 naman halin sa 30 ka miyembro sang Justice panel nga magausisa diri.
Ginpahayag pa ni Velasco nga kaangay nagalas-ay pa ang iban nga mga Kongresista nga magsuporta sa impeachment bangud siyam ka adlaw na lang sang sesyon ang nabilin tubtob Pebrero 5 kag Pebrero 7 naman ang adjournment. Nakatalana nga mag-resume liwat ang sesyon sa palaabuton nga Hunyo 2.
