Nagpasaka na sang kaso ang Department of Agriculture (DA) sa importer nga ginapahayag ulamid sa smuggling ukon pagpuslit sang P20.8 million nga balor sang carrots kag puti nga sibuyas sa Port of Subic.
Ginpangunahan sang Bureau of Plant Industry (BPI) ang pag-file sang kaso batuk sa Betron Consumer Goods Trading sa Olongapo City Prosecutor’s Office bangud sa paglapas sa Food Safety Act kag 1978 Plant Quarantine Law.
Suno sa BPI, una sila nga nagpadala sang show-cause order batuk sa nasambit nga kumpaniya apang ginbalewala ini rason sang tayuyun nga pag-file sang kaso.
Matandaan nga sang Agosto sang nakaligad nga tuig, lima ka shipping container ang nasabat sa amo nga pantalan nga nagakaunod sang masobra 56 kilo sang carrots kag masobra 85 kilo sang puti nga sibuyas.
Ang mga ang gindeklarar bilang frozen fish egg ball apang sang usisaon, natumod nga carrots kag sibuyas ang unod sini.
Suno kay Subic Port – National Plant Quarantine Services Division area manager Carmela Rivera, gilayon nga ginkumpiskar ang mga produkto agud maprotektahan ang ikaayong lawas sang publiko.
Natumod naman ang presensiya sang E.coli kag mataas nga pesticide residue sa mga nakumpiskar nga produkto.
