Ginsita nanday Committee Chairperson Risa Hontiveros kag Senator Sherwin Gatchalian ang ginpatigayon nga inspeksyon sang Local Government Unit sang Porak Pampanga sa Lucky South 99 POGO Hub.
Sa ginhiwat nga committee hearing sang senate committee on Women, Children, Family Relations and Gender Equality, ginkadismaya sa mga senador ang nangin sabat ni Porac Pampanga Mayor Jaime Capil sang ini ang gin-usisa natuhoy sa ila ginpatigayon nga inspeksyon kaupod ang Philippine National Police nga ginpangunahan sang nasambit nga alkalde kaupod si anay PNP Porac Chief Lt. Col. Palmyra Guardaya sadtong Agosto 25, 2023.
Pahayag sang alkalde, tubtob lamang sa guard house ang nalab-utan sang ila ginpatigayon nga inspeksyon bangud limitado lamang ang access nga ginhatag sa ila balibaron nga indi naman mabaton ni Gatchalian.
Suno kay Gatchalian, kasubong nga wala maintindihan sang alkalde ang malapad nga gahum sang isa ka LGU sa pagpatigayon sang ginatawag nga inspekesyon. Sa pagkamatuod suno pa sa senador, wala sang inspeksyon nga natabo bangud tubtob lamang sila sa guha kag wala man nila nalibot kag nasulod ang mga edipisyo sa sulod sang Lucky South 99.
Panindugan naman ni Capil, wala nila ginpilit ang pagsulod sa compound sang POGO hub bangud nga basi sila man ang pagakasuhan kag wala man sila sang may nabaton nga report nga nabaton natuhoy sa pagpang-abuso ukon ano man nga krimen sa nasambit nga POGO.
