Padayon nga gina-verify ang mga report angot sa ginaalegar pagkamatay ni Interim Supreme Leader sang Iran nga si Ayatollah Alireza Arafi sa isa ka airstrike, pila ka minutos matapos nga pormal ini nga gin-appoint sa iya posisyon.
Pormal nga gin-appoint si Ayatollah Arafi bilang miyembro sang temporary Leadership Council sang Iran kasunod sang kamatayon ni Supreme Leader nga si Ayatollah Ali Khamenei sa serye sang US-Israeli strikes.
Sandig sa mga report, antes ang ginaalegar nga bag-o nga pag-atake, si Arafi magaupod kuntani kanday President Masoud Pezeshkian kag Chief Justice Gholamhossein Mohseni Ejei agud temporaryo nga buslan ang mga katungdanan sang Supreme Leader samtang ang Assembly of Experts wala pa makapili sang magabulos.
Samtang, bangud sa kamatayon ni Khamenei, nagdeklara ang pungsod sang 40-day mourning period.
Magkatuhay naman ang reaksyon sa Tehran bangud madamo ang nagpangasubo kag nagsinggit sang protesta batok sa Amerika kag Israel, samtang may mga report man nga ang pila ka mga pumuluyo sekreto nga nagaselebrar.
Nahibaluan nga hugot nga ginpakamalaut ni Presidente Pezeshkian ang pagpatay sa ila nga Supreme Leader kag gintawag ini nga deklarasyon sang inaway batok sa mga Muslim.
Ginahulat pa ang opisyal nga kumpirmasyon gikan sa gobyerno sang Iran kag state media angut sa matuod nga kapalaran ni Ayatollah Arafi kasunod sang ginreport nga airstrike.
