ROXAS CITY – Emosyunal nga ginpakigbahin sang isa ka amay ang iya eksperyensiya kag nalampuwasan nga pagtilaw sa pagpadako kag pagtimakas agud mapatapos sa pagtuon kag mangin propesyunal ang iya apat ka mga kabataan.
Sa interview sang Bombo Radyo kay Laurence Delos Reyes sang Inzo Arnaldo Village, sini nga syudad, ginpahayag sini nga dako ang papel sang ginikanan sa mangin puturo sang ila kabataan.
Suno diri nga kun ano ang luyag sang mga ginikanan nga maabot sang ila mga kabataan, ini man ang ila dapat ipabatyag, kun luyag sang ginikanan nga may respeto ang ila kabataan, dapat magpa-respeto man ang mga ginikanan.
Ginpakigbahin man ni Delos Reyes ang kalipay nga iya nabatyagan nga makita nila sang iya asawa nga ginsunod sila sang ila apat ka mga kabataan nga lunsay mga madinalag-on sa ila karera.
Nagatrabaho sa gobyerno ang ila subang nga babayi, nurse ang ikaduha nga bata nga babayi, nagtapos sang electrical engineering ang ikatatlo kag naga-isahanon nga lalaki, samtang naggradwar bilang cum laude ang hinipon nila nga babayi.
Luha sang kasadya man ang nabatyag sang amay matapos nga ginhanduraw ang kabudlay nga ila ginpang-agyan nga mag-asawa mapatapos gid lamang ang ila mga kabataan.
Nahibaluan nga nagapuyo sadto anay ang mag-asawa sa Marilao, Bulacan apang sang naghina ang ila gamay nga negosyo, gindesisyunan nila nga magpauli diri sa Roxas bangud magasugod na sa kolehiyo ang ila kabataan.
Balon ang gamay nga capital kag kaisog sang buot nga makaumpisa liwat, nagnegosyo sila pinaagi sa paghimo sang sweet dried dilis nga ginbuligan sang ila mga kabataan, pinaagi sa pagbaligya sa ila kakilala.
Nagapasalamat man ini sa Ginoo nga wala gid sila ginpaslaw sa ila handom nga mag-asawa kag natigayon nga masarangan ang pagpaeskwela sa ila kabataan sa bulig man sang ila himata.
Mensahe ni Delos Reyes sa mga Tatay nga indi gid pag-ipakita nga nagapangluya sa kabuhi kag indi pagsakiton ang ila kabataan, bangud kun ano ang ginapabatyag sa mga kabataan, ina man ang ila igabalik sa inyo nga mga ginikanan.
