Ginpa-bombo sang pila ka mga pumuluyo sang banwa sang Pilar ang Tatak Alex’s Dos Food Packages bangud sa gina-alegar pagpangtunto sini.
Sa interview sang Bombo Radyo kay Zeni Tenorio, iya ginpahayag nga si Joan Casipit, tag-iya sang nasambit nga food packages services, amo ang nag-taban sang dalagku nga kantidad.
Suno kay Tenorio, ang negosyo ni Casipit ang isa ka paluwagan rason nga naganyat man ang bata sini nga magsulod kun sa diin nagabayad ini sang P1,600 kada bulan para kuntani sa handa sa birthday.
Apang sang mismo nga petsa na sang birthday, wala sang nag-abot nga letchon suno sa na-istoryahan.
Gin-reschedule ang pagdul-ong sang amo nga letchon kuntani sa Disyembre 31, 2025, apang pag-abot sang lechon, nakibot ang ini nga tuman kanipis sang unod kag puro dahon sang tanglad ang yara sa sulod.
Pahayag pa niya, madamu sila ang nabiktima sang nasambit nga indibidwal kag kalabanan yara sa luwas sang pungsod ukon overseas Filipino worker (OFW) rason nga gusto gid nga mabawi ang tanan nga mga ginbayad.
Dugang pa niya, nagpablotter na sila sa barangay kag ginpadal-an sang summon apang ang utod lang sini ang nag-atubang.
Desidido man nga magpasaka sang kaso ang mga biktima sa tion nga indi magpakita ang nasambit nga indibidwal.
Bukas man ang Bombo Radyo sa sabat ni Joan Casipit nahanungod sa gina-alegar pagpangtunto sang iya ginapanag-iyahan nga Food Packages.
