Indi magnubo sa lima ka mga barko ang gin-atake sa Persian Gulf kag Strait of Hormuz matapos nga gin-atake sang mga sakayan nga kargado sang mga eksplosibo halin sa Iran ang duha ka fuel tanker sa kadagatan sang Iraq.
Duha ka tanker ang nasunog kag isa ka tripulante ang napatay, samtang padayon nga ginapangita sang mga rescue team ang iban pa nga nadula.
Suno sa report, lakip sa mga barko nga naigo amo ang Safesea Vishnu kag Zefyros nga lunsay kargado sang gatong halin sa Iraq.
Ang insidente ginakabig nga pagdugang sang tensyon sa tunga sang Iran kag mga pwersa sang Estados Unidos kag Israel, nga nakahalit sang tubtob 16 ka mga barko halin sang nagsugod ang mga pag-atake sang Pebrero 28.
Bangod sang nagapadayon nga kinagamo sa Strait of Hormuz, nga ginaagihan sang halos ikaapat nga bahin sang supply sang langis sa kalibutan, halos nag-untat na ang shipping sa lugar.
Nagtuga man ini sang pagtaas sang presyo sang langis sa pangkalibutanon nga merkado, nga naglab-ot sa pinakamataas nga lebel halin sang 2022.
