ROXAS CITY – Natalana nga dal-on sa Office of the City Prosecutors kag iga-remit sa Bureau of Jail Management and Penology (BJMP) Roxas City Jailws subong nga adlaw ang wanted nga persona nga akusado sa kaso nga Syndicated Estafa sa Barangay Poblacion, banwa sang President Roxas, Capiz.
Ini ang ginpahayag ni Police Chief Master Sergeant Michael Capapas sang mainterview sang Bombo Radyo.
Matandaan, nga ginkilala ang nadakpan kay Lito Burias, 36 anyos, residente sang Sitio Arcabalo, Barangay Bolo, Roxas City.
Ang warrant of arrest batuk sa akusado ang ginpirmahan kag ginpapanaog ni Judge Kristine Tiangco-Vinculado sadtong Agosto 28, 2019.
Wala sang ginrekomendar nga piyansa ang korte para sa temporaryo nga kahilwayan sa akusado.
Mahibaluan nga si Burias ang isa sa anom ka mga indibidwal nga yara sa likod sang FOREX investment scam sa probinsiya sang Capiz.
Una na nga nadakpan sang mga kapulisan ang ginbansagan nga FOREX investment scam queen nga si Lourdes Baarde sang Barangay Baybay, Roxas City kag Joel Domayan sang Quezon City.
Kalakip man sa anom ka mga indibidwal nga akusado sa kaso nga Syndicated Estafa amo sanday Rachel Chavez kag Rebecca Venturado sang Mandaluyong City kag Gerlinski Bravo sang Alcazar Subdivision, Roxas City.
