ROXAS CITY – Nagparekord sa Roxas City Police Station ang isa ka 20-anyos nga persona nga imbolbado sa nagluntad nga sparring sa Sitio Nasagud, Barangay Lanot, Roxas City.
Aminado si Ruther John Mistidio sang Barangay Sibaguan sining siyudad nga may yara sang nagluntad nga sparring sa tunga nila ni Leonard Brian Torrenueva sang Barangay Poblacion, Ivisan, Capiz.
Ginaalegar ni Mistidio nga una ini ginhangkat sang away sadtong bulan sang Marso bangud may yara sila sang daan nga hiligut-anon sadtong highschool kun sa diin tuman nga naakig sa iya si Torrenueva.
Dugang pa sini nga wala ini sang ideya nga may yara na sang madamo nga tawo sa lugar sang nagpadulong ini upod ang iya mga abyan.
Apang, base naman sa pahayag ni Torrenueva sa Ivisan Municipal Police Station sa pagpanguna ni Barangay Kagawad Rodulfo Centillo nga samtang yara pa ini na-base sa United States of America una na ini ginhangkat sang away ni Mistidio.
Bangud diri natigayon ang ila sambuwa kun sa diin ginabulubanta nga naglab-ot sa masobra 60 ka mga tawo ang naglantaw sa ila nga sparring.
Matandaan nga nag viral ang video sang duha kun sa diin ginaalegar nga ginapustaan pa ang ‘sparring’ sang nasambit nga mga indibidwal.///END
