ROXAS CITY – Dead on arrival nga ginpadangat sa ospital ang 35-anyos nga jail officer sang BJMP Roxas City Jail matapos ma-aksidente ang ginamaneho nga motorsiklo sa barangay Cabugao, syudad sang Roxas sang tinalikdan nga Marso 25.
Ginkilala ang biktima kay JO2 July Posadas, kag residente sang Sara, Iloilo.
Suno kay J/SINSP Dever Fantilaga, papuli na kuntani ang biktima sa iya boarding house sakay sa iya motorsiklo takna alas 11:30 sang gab-i sang nalabayan nalang ini sang iya kaupod nga may mga bagras na kag ara sa kilid sang dalan.
Ginapahayag nga conscious pa ang biktima kag nagpamalibad nga dal-on sa ospital rason nga ginbalik ini sa BJMP Roxas City Jail, apang nadulaan sang animo ang biktima rason nga ginpadangat ini sa Capiz Emmanuel Hospital apang gindeklarar nga dead on arrival sang doktor.
Indi pa ma tul-id ni Fantilaga ang nangin kamatayon ni Posadas bangud wala man sila sang may nakita nga patal nga pilas sa biktima nga nangin tunaan sang insigida nga kamatayon, apang posible suno diri nga gin-atake sang iya hypertension ang biktima samtang nagamaneho rason nga hinali nga nagpondo sa kilid sang dalan.
Ginahulat pa sa karon sang pamunuan ang death certificate sang biktima agud mahibaluan ang gintunaan sang iya kamatayon.
Samtang yara naman ang bangkay sini sa iya asawa sa Estancia, Iloilo.
