JAMINDAN, CAPIZ- Ginpatpat sang hepe ang Jamindan Municipal Police Station ang mga accomplishments sang ila nga talatapan sa banwa sang Jamindan, Capiz halin Enero tubtob Hulyo 2025.
Sa interview sang Bombo Radyo kay Police Captain Peter John Celino, Officer-In-Charge sang Jamindan Municipal Police Station, iya ginpakigbahin ang mga accomplishments sang ila nga talatapan sa diin nakarekord sila sang 12 ka mga naaresto nga indibidwal nga ginakalakipan saang tatlo ka Most Wanted Persons kag siyam ka mga Other Wanted Persons, pamaagi sa pagserbe sang mga warrant of arrest. Isa naman ang naaresto sa search warrant implementation sa diin nakuhaan ini sang indi-lisensyado nga armas-luthang kag granada.
Dugang pa sini, ginatutukan man sang Jamindan PNP ang pagsolbar sa mga krimen, kun sa diin 100% sang 20 ka mga crime incidents nga naitala ang nasolusyunan. Dose (12) sa mga kaso ang napasaka na sa korte, samtang walo ka kaso naman ang na-settle. Magluwas diri, ginapadayon man nila ang kampanya batok sa loose firearms, kun sa diin naka-surrender sang 20 ka mga armas-luthang sa idalom sang “Armas Baylo Bugas” program, nga suportado sang lokal nga gobyerno.
Nagapadayon man suno sa iya ang barangay visitation program sang ila nga talatapan sa 30 ka mga barangay sang Jamindan, kalakip na ang lima ka mga barangay nga mabudlay sudlon sa oras sang emergency.
Sa pihak nga bahin, apisar nga gindeklarar na nga drug-free municipality ang banwa, nagapadayon sa gihapon ang hugot nga monitoring batok sa iligal nga droga agud mapabilin ang kaayusan kag seguridad sang mga pumuluyo.
Gugot naman ang bug-os nga suporta sang mga kapulisan sang Jamindan Municipal Police Station sa mandato sang Philippine National Police nga 5-minutes response sa diin nga amo gid ang ila nga ginatinguhaan nga maimplementar.
Nagapalab-ot naman sang pagpasalamat si Celino sa mga pumuluyo sang Jamindan sa ila nga kooperasyon kag suporta sa mga programa sang kapulisan. Ang mga kadalag-an sang kapulisan naghatag man sang importansya sang pagbinuligay sang tagsa-tagsa agud mapabilin ang kalinong kag katawhay sa banwa.
Interviewed by Bombo Francis Biñas & Bombo Sunnie Mae Batencila
