Jeepney drivers nagapanawagan nga taasan ang plete bangud sa padayon nga pagtaas sa presyo sang diesel

ROXAS CITY – Nagapanawagan ang mga jeepney drivers nga sabton na sang natungdan nga ahensya ang ila apelar nga pasakaan ang plete bangud sa padayon nga pagtaas sa presyo sang produktong petrolyo ilabi na ang diesel.

Sa interview sang Bombo Radyo kay Joe Bacle, driver sang jeep nga may biyahe Jamindan to Roxas City kag vice versa suno diri daku naman nga problema sa ila nga mga drivers ang P6 nga taas sa kada litro sang diesel.

Pahayag sini, ang kita nga P1,500 sa isa ka adlaw ang sakto lang panggasolina para sa 15 litros kag wala na sang mapauli nga kuwarta sa ila balay.

Masuwerte na suno diri, kun madamo sang pasahero ang iya masakay bangud may nahahatag pa siya nga gamay nga kantidad para sa iya pamilya.

Wala naman sang daku nga impact ang pagbalik sang klase bangud Biyernes kag Dominggo lamang ang mga estudyante kay nagaboard naman ini sa syudad.

Suno kay Bacle, kun magapadayon ang pagtaas sang gatong, perdido gid sila nga mga drivers kag mapilitan na lang mag-untat.

Nagapanawagan naman ini sa gobyerno nga amat-amaton lang ang pagtaas sang presyo kag indi pag gulpihon kaangay sang natabo subong nga adlaw nga P6 gid ang gintaas kun sa diin madako na nga kantidad para sa ila.

Samtang, nagpaguwa naman sang pahayag si Atty Cheloy Garafil nga ginatun-an na sang LTFRB kun pila ang igapasaka nga plete kag lauman ini sa bulan sang Setyembre.