Ginsulod sang wala pa natumod nga duha ka mga kawatan ang isa ka balay sa New Road Barangay Banica, Roxas City.
Ginabulubanta nga nagdangat sa kapin P1,000,000 nga balor sang pagkabutang ang gintaban sang mga kawatan.
Sa impormasyon nga nakuha sang Bombo Radyo sa caretaker sang amo nga balay nga si Monica Calinao, 55-anyos. Sa panaysayon ni Monica, sumugod sang bulan sang Hulyo, nakikita sang apo sini nga may naga-standby nga persona nga naka-motor sa lugar. Sang damlag lang, nadakpan sang mga ini nga halin sa lugar, may ginahakot na nga pagkabutang ang persona nga ginakarga sini sa iya motorsiklo. Dugang pa sini, nga nakuha pa sang mga suspek nga mag-inom sang mga imported nga makahulubog nga ilimnon sa amo nga balay.
Duha ang mga ginaalegar nga suspek ang isa, amo ang nagakuha sang mga pagkabutang ang isa, look out. Masobra na duha ka semana nga ginabalik-balikan sang amo nga mga personal ang balay nga ginakawatan sang mga ini.
Kahapon, sang nagbalik ang isa sa mga persona sa lugar, pasikreto nga ginkuhaan sang laragway ni Monica ini kag madasig nga ginreport sa mga otoridad.
Nakuha sang mga kawatan sa amo nga balay ang isa ka microwave oven, mga aircon, apat ka TV, refrigerator, mga antik nga pagkabutang sa kusina kag madamo pa nga iban.
Sa karon, padayon ang ginahiwat nga imbestigasyon sang Roxas City PNP kag may ginatudlo na nga person of interest ang mga ini sa natabo nga kinawatay sa nasambit nga lugar.
