Padayon pa nga gina-assess ang kahalitan nga naangkon sang barko nga Bureau of Fisheries and Aquatic Resources (BFAR) nga BRP Datu Pagbuaya sa diin duha (2) ka beses nga ginbombahan sang water cannon kag gindutdutan sang China Coast Guard vessel malapit sa Bajo de Masinloc sadtong Disyembre 4.
Ginpahayag ni Philippine Coast Guard spokeperson for the West Philippine Sea Commodore Jay Tarriela nga ginahulat pa ang pag-abot sang BFAR vessel sa pantalan sa Bataan para mabanta ang kalaparon sang kahalitan sa barko.
Una na nga ginkumpirmar sang opisyal ang nasambit nga agresyon gikan sa 3 China Coast Guard vessels kag 2 Peoples’ Liberation Army Navy vessels samtang nagapatigayon ang BFAR vessel kaupod ang PCG vessels sang routine maritime patrol sa amu nga lugar agud suportahan ang mga Pilipino nga manugpangisda.
Sa pihak naman sang insidente, madinalag-on sa gihapon nga nadul-ong sang PCG kag BFAR ang suplay nga langis kag mga pagkaon sa mga manugpangisda nga Pilipino nga yara sa Bajo de Masinloc kag Escoda shoal.
