ROXAS CITY – Nagdangat sa kapin P500,000 ang halit nga gintuga sa nagluntad nga sunog sa isa ka warehouse sa New Road Banica, Roxas City kagab-I, Enero 5, 2024.
Sa interview sang Bombo Radyo kay FSINSP Michael L Lopez, Acting City Fire Marshal sang Roxas City Fire Station, suno diri ginabulubanta nagsugod ang sunog 6:15 kagab-i sa warehouse nga ginapanag-iyahan nanday Steve kag Christy Chua.
Ginapahayag, sarado kag naka-kandado pa ang nasambit nga bodega rason agud mabudlayan sa pagsulod ang mga bombero kag naglab-ot sa 2nd alarm ang sunog.
Naglab-ot sa kapin 6 ka oras ang pagpalong sang kalayo kag gindeklarar nga fire out takna 12:38 sang maga-aga.
Mahibaluan nagresponde sa amu nga sunog ang 9 tanan ka firetrucks nga ginakalakipan sang Roxas City Fire Station, kaiping nga fire stations kasubong sang Panay, Panitan kag Ivisan Fire Station kag mga fire volunteers.
Masuwerte naman nga wala sang napilasan sa nasambit nga sunog.
Dugang pa ni Lopez, indi pa matumod sa karon kun ano ang gintunaan sang sunog kag nagapadayon pa ang imbestigasyon.
Paalinton ni Lopez sa publiko nga siguraduhon nga wala nakasaksak ang mga appliances kag nakasindi nga kandila ukon ano pa posible tunaan sang sunog antes magbiya sa lugar ukon balay agud malikawan ang kasubong nga insidente.
