ROXAS CITY – Ginkumpirma sang presidente sang Grains Retailers Confederation of the Philippines Inc. (GRECON) ang nangin pahayag ni Senator Nancy Binay nga may kakulangon sa suplay sang National Food Authority o NFA rice sa Pilipinas.
Sa exclusive interview sang Bombo Radyo Roxas kay James Magbanua, anay board member sang probinsiya sang Capiz, ginpahayag sini nga may kakulangon sa karon sa NFA rice nga nagaserbe nga subsidized rice sa sais tobtob otso porsyento sang populasyon sa Pilipinas nga nagasalig lamang sa barato nga bugas kasubong sang NFA.
Nagtaas man ang presyo sang commercial rice, bangud sa pagtaas sang presyo sini sa world market, sa diin ginalauman nga mas magataas pa ang presyo sini pag-abot sa lokal nga merkado.
Gin-ako man ni Magbanua nga apektado man sila sa GRECON bangud wala sila sang mabaligya nga bugas sa merkado matapos nga ginahatagan sang prayoridad sang gobyerno ang programa sang DSWD kag mga probinsiya nga apektado sang mga kalamidad.
Nagapati man ini nga bisan paano makabulig sa kakulangon sang NFA rice ang pag-import sang 250,000 metric tons nga bugas sa iban nga nasyon, apang posible nga sa bulan pa sang Marso tobtob Abril maabot ini sa Pilipinas.
