Nagtukod ang House of Representatives sang joint panel nga ginakabuuan sang lima ka komite agud tutukan ang pagkontra sang mga ahensya sang gobyerno sa smuggling, hoarding, price manipulation, kag iban pa nga hilikuton nga nagapugong sa kalakalan.
Suno kay Speaker Romualdez, pinakauna nga ginatuyo sang layi nga ini amo ang himuon nga ma sabot-kaya ang presyo sang pagkaon kag halungan ang kabuhi sang mga mangunguma.
Pagatawgon nga “Quint Committee” ang nasambit nga joint panel nga ginpangunahan sang House Committee on Ways and Means nga ginapamunuan ni Albay Rep. Joey Salceda.
Dugang pa ni Speaker nga pagabantayan sang joint panel ang pagpatuman sang bag-o nga ginpermahan nga Republic Act (RA) No. 12022, ukon ang Anti-Agricultural Economic Sabotage Act.
Sang nakaligad nga semana, ginpermahan ni Presidente Ferdinand Marcos ang nasambit nga layi sa Palasyo sang Malakanyang nga gintambungan sang mga senador, kongresista kag mga opisyal sang gobyerno.
Samtang, suno kay Presidente Marcos, ginakabig nga “economic sabotage” ang smuggling, hoarding, profiteering, kag cartel operations, kag pagapasakaan sang mabug-at nga multa kag habangbuhay nga pagkabilanggo ang mapamatud-an nga sangkot sa mga ilegal nga buluhaton.
Sa idalom sang layi, gintukod man ang council kag enforcement group para sa pagtapna sang smuggling operations kag pagdakop sa mga magalapas sa layi.
