ROXAS CITY-Ginkompirmar sang talatapan sang Municipal Disaster Risk Reduction and Management Office ukon MDRRMO sang banwa sang Sapian nga wala sang kaangtanan sa COVID-19 ang gintunaan sang kamatayon sang 39-anyos nga Locally Stranded Individual nga napatay sa probinsiya sang Aklan.
Sa interview sang Bombo Radyo kay Assistant MDRRM Officer Nomar Oroceo ginpahayag sini nga ang napatay ang ginkilala nga si Roque Felisado, tumandok sang Barangay Lonoy, Sapian Capiz.
Suno kay Oroceo nga Agosto 4 nagpauli si Felisado sa ila nga poluy-an sa New Washington, Aklan gikan sa Metro Manila.
Apang, sang Agosto 5, gindala ini sa ospital kag ginbawian sang kabuhi.
Luyag naman sang himata nga ihaya ang bangkay ni Felisado rason nga nagpakig-angut na sila kay Punong Barangay Pancho Horario kun sa diin naglaong ini sa talatapan sang MDRRMO agud makapauli sa nasambit nga banwa.
Gin-athag ni Oroceo nga Gastric Cancer ang gintunaan sang kamatayon ni Felisado nga anom na ka bulan na sini ginasuprehir.
Gin-athag man sini nga negatibo ang resulta sang RT-PCR test ni Felisado rason nga ginpahanugotan ini nga makapauli sa nasambit nga banwa subongman ginpaidalom naman sa isolation ang tiayon sini
