ROXAS CITY – Dismayado ang Punong Barangay sang Punta Tabuc matapos nga naulamid naman ang amu nga lugar sa mga iligal nga buluhaton kasubong sang pagduso sang iligal nga druga.
Sa interview sang Bombo Radyo kay Kapitan Nestor Buenviaje, aminado ini nga problema ang iligal nga druga sa ila barangay.Apang nalipay man ini nga amat-amat na nga nagkaladakpan ang nagapatigayon sang iligal nga aktibidad kag nagapakalain sa amu nga barangay.
Matandaan nga nadakpan sa separado nga buybust operation sang Philippine Drug Enforcement Agency (PDEA) ang mag-ulutod nga Oriel kag Omar Arandez nga residente sang Sitio Cassandra, Barangay Punta Tabuc syudad sang Roxas kun sa din nalakip ang mga ini sa monitoring sang BADAC Council.
Ginakahangaw-an sang kapitan, ang pagka-ulamid sang mga kabataan sa iligal nga aktibidades nga mangin tunaan sang pagkaguba sang ila buas damlag.
Ginapangabay sini ang mga ginikanan nga indi pagkunsintihon ang ila mga kabataan sa amu nga aktibidad bangud magatuga lamang ini sang problema sa ila pamilya.
Panugyan sini sa mga puuluyo nga tsekyaron gid ang ila mga kabataan kag kilalanon ang mga abyan ukon kaupod sang mga ini.
Dugang pa ni Buenviaje, nga magpangamuyo sa Makaako agud indi maengganyo sa malain nga buluhaton kag malulong sa bisyo.
Samtang, nagapadayon ang pagmonitor sini sa mga aktibidades sa nasambit nga barangay.
