ROXAS CITY-Arestado ang mag-asawa kag isa pa ka lalaki sa drug buybust operation sa Barangay Poblacion Norte, Ivisan, Capiz.
Ginkilala ang mga naaresto nga sanday Jean Francis Lima, 34-anyos; Jon-Jon Lima, 38-anyos kag German Bolarde, 49-anyos, lunsay residente sang nasambit nga lugar.
Narekober sa mga drug suspek ang 2 dalagkuan nga sachets kag isa ka magagmay nga sachet nga may unod nga shabu, cellphone, P19,000 nga boodle money, kag P1,000 na buybust money.
Ang narekober nga droga ang may kabug-aton nga nagalab-ot sa 128 grams nga nagabalor sang halos P1.6 million.
Suno sa interview sang Bombo Radyo sa kay Police Master Sergeant Ramil Arcangeles ginpahayag sini nga nalakip sa High Value Target ang mag-asawa nga Lima kalakip na si Bolarde.
Gindugang pa sini nga dako ang posibilidad nga sila ang ginakuha sang stocks sa mga nagaduso sa iligal nga droga indi lang sa siyudad mangin sa kalakip nga mga kabanwahanan.
Samtang magapatigayon pa sang dugang nga imbestigasyon ang mga kapulisan agud matumod ang ginakuhaan sang iligal droga sang mag-asawa kag marekober ang ginpahayag iban pa nga mga stocks nga yara sa ila sini kustodiya.
Sa karon nakaaresto na sa Ivisan Municipal Police Station ang mga suspek kag magapangatubang sa panumbungon nga paglapas sa Republic Act 9165 ukon Comprehensive Dangerous Drugs Act of 2002.
Ang nasambit nga operasyon ang ginkasa sang mga katapo sang Station Drug Enforcement Team sang Ivisan Municipal Police Station, Roxas City Police Station kag Philippine Drug Enforcement Agency.
