ROXAS CITY – Naghimo sang isa ka kasulatan si Punong Barangay Siolly Andrade sang Barangay Bolo, Roxas City agud masolbar ang problema sa ginareklamo nga tangkal sang baboy sa amo nga lugar.
Suno kay Andrade nga nakalab-ot sa iya ang reklamo sang mag-iloy nga Bussel Berano kag Monica Deflor natuhoy sa ginaalegar mabaho nga babuyan nga ginapanag-iyahan nanday Ma. Alona Blancaver, Edna Landa Florendo kag Mansueto Caola.
Bangud diri, ginpakamaayo ni Andrade nga paatubangon ang magtimbang nga bahin sa iya talatapan kag diri nadihon ang isa ka kasugtanan.
Diri nakasugtan nga tapuson lamang ang kapin duha ka bulan agud ma-dispose ang ginahuptan nga mga baboy.
Matapos ang duha ka bulan, mahimo pa makahupot sang baboy ang nasambit nga mga tag-isa apang kutob lamang sa isa ang ila mahimo mahuptan.
Kinahanglan man suno diri nga ma-mentinar ang katinlo sang tangkal samtang nagahupot sila sang baboy sa nasambit nga lugar.
