ROXAS CITY – Nagdepensa ang punong barangay sang Barangay Intungcan, Pontevedra, Capiz natuhoy sa ginpalab-ot sa Bombo Radyo sang ila barangay kagawad natuhoy sa ginaalegar kwestiyunable nga implementasyon sang pagkaayo sang streetlights kag drainage sa ila lugar.
Sa interview sang Bombo Radyo kay Punong Barangay Jorge Casipit Jr., ginpahayag sini nga una nga nakasugtan sang mayorya sang konseho nga ipaguwa ang pondo sa 1st quarter sang development fund para sa nasambit nga mga proyekto bangud sang kahalitan nga natuga sang pagpanalasa sang bagyo nga Ursula sang nakaligad nga tuig.
Suno diri nga bisan Marso na sila nakapaguwa sang pondo, Enero pa lamang ginsuguran na ang nasambit nga proyekto kag ini ang iya na lamang gin-medyusan.
Mahibaluan nga kapin P50, 000 ang gin-withdraw para sa rehabilitasyon sang streetlight kag ginsegundahan sang pag-withdraw sang dugang nga P50, 000 para naman sa pagkaayo sang drainage.
Apang suno kay Casipit, kapin P35, 000-P37, 000 ang para sa materyales sa kada proyekto kag ang kapin P12, 000 ang para sa labor.
Apang naatrasar ang nasambit nga proyekto suno kay Casipit bangud sang ginpatuman nga lockdown.
Mahibaluan nga gina-kwestiyon ni Kagawad Eufemia Ramon nga bilang sadto anay chairperson sang Committee on Appropriations sang barangay, wala siya ginpapirma sang voucher antes gin-withdraw ang pondo.
Apang panindugan ni Casipit nga pormalidad na lamang ang pirma ni Ramon kag ginpadasig na ang pag-withdraw sang pondo matapos na ang amo nga proyekto.
Apang ginkwestiyon ni Ramon kun legal bala ang pagpaguwa sang pondo nga wala siya sang pirma sa voucher.
Luyag man sini mahibaluan kun mahimo bala nga mabaton sang isa ka supplier ang isa ka voucher kun kulang sang pirma.
Ginpanindugan man ni Ramon nga matuod nga nagsugod ang rehabilitasyon sadtong Enero apang ang gingamit pa diri nga pondo amo ang nabilin gikan sang tuig 2019.
Gindugang pa sini nga nakit-an niya nga nag-alabutan ang mga materyales para sa amo nga rehabilitasyon kasunod sang pagdangop na niya sang amo nga isyu sa Bombo Radyo.
