ROXAS CITY – Nagpasaka sang reklamo sa Sangguniang Bayan (SB) sang banwa sang Panay ang mga residente sang Barangay Lanipga, sang amo nga banwa batuk kay Punong Barangay Marilyn Blanco.
Ini ang ginkompirmar ni SB Member Christian Theodore Mejia sang mainterview sang Bombo Radyo.
Suno kay Mejia nga ila pa ini nga ginatun-an kag gintugyan sa Committee of the Whole.
Mahibaluan nga luyag sang mga residente nga pasakaan sang reklamo si Blanco sa Office of the Ombudsman kag Department of Interior and Local Government (DILG).
Matandaan nga ginreklamo si Blanco sang pila ka mga benepisyaryo sang Social Amelioration Program matapos nga ginbuhinan sini sang tag P2,000 ang nabaton nga ayuda sang mga benepisyaryo nga ginpahayag ginhatag sa mga households nga wala makabaton sang bulig-pinansyal.
Una naman ng ginpasakaan sang panumbongon sang Criminal Investigation and Detection Group (CIDG) Capiz sa Provincial Prosecutor’s Officer si Blanco angut sa mga alegasyon batuk sa iya.
Mahibaluan nga base sa ginpaguwa nga press release sang CIDG-Region 6 magapangatubang sang panumbongon nga paglapas sa R.A. 3019 (Anti-Graft and Corrupt Practices Act) ang nasambit nga punong barangay kun sa diin apat ka mga complainants ang nagdangop sa CIDG-Capiz.
