ROXAS CITY – Nakarekober na sa CoVid-19 ang 67 anyos nga lalaki nga isa ka punong barangay sa banwa sang Panitan, Capiz antes pa man nag-abot ang iya resulta sa RT-PCR test nga positibo ini sa nasambit nga virus.
Ini ang gin-kompirmar ni Dra. Rosine Avelino, Panitan Rural Health Unit Officer sang mainterview sang Bombo Radyo Roxas.
Suno kay Avelino nga nakarekober na ang nasambit nga Punong Barangay antes paman nag-abot ang resulta sang Real Time-Polymerase Chain Reaction Test (RT-PCR Test) sini sang Martes sang gab-i.
Mahibaluan nga diabetic kag nagasuprer sang highblood ang nasambit nga kapitan.
Wala man ini sang history of travel sa mga lugar nga infected sang virus.
Gindugang pa sini nga na-close contact sang amo nga kapitan ang isa ka COVID-19 positive sang Agosto 22 rason nga ginpaidalum ini sa Swab Test sang Agosto 27 kag ginpaidalum sa quarantine.
Suno pa diri nga gindeklarar nga “recovered” ang nasambit nga kapitan antes paman nag-abot ang resulta sang RT-PCR Test kag nagtakup na ang quarantine period sini.
Nagapadayon pa sa karon ang contact tracing sa mga indibidwal nga posible na-close contact sang nasambit nga kapitan.
