PRESIDENT ROXAS, CAPIZ – Ginpasiguro sang President Roxas PNP nga mamintinar ang kalinong sa nagapadayon nga pag-demolish sa onse (11) ka panimalay sa Brgy. Hanglid, banwa sang President Roxas.
Sa interview sang Bombo Radyo kay PMAJ Alfred De Leon, ginpahayag sini nga nagapabilin nga matawhay ang ikatatlo nga adlaw sang pag-demolish kag wala sang kun anuman nga nagluntad nga kinagamo sa tunga sang demolition team kag mga apektado nga pamilya.
Suno kay De Leon nga as of 5:00pm Pebrero 4, pito (7) na ka balay ang totally nga naguba.
Subong nga adlaw Pebrero 5, nagapadayon ang pag-demolish sa nabilin pa nga panimalay.
Nahibaluan nga tapuson tubtob Biyernes ang pag-demolish sa 11 tanan ka panimalay sa nasambit nga lugar.
Mensahe ni De Leon nga nagasimpatiya ini sa mga naapektuhan apang wala sila sang mahimo kag ginatuman lang nila ang mandu sang korte kag nagalaum ini nga mapabilin ang matawhay nga pag-demolish tubtob matapos.
